Kokthum by Bikash Debbarma
Rabindra Kishore Debbarma Kokborokbai gwdaljak boromgwnang Rabindra Kishore Debbarma wngkha khoroksa kokborok kokrwbaini sak tharwi samung khwlainaini bisingo khoroksa. Bo 1954 bisini September 15 salmario Sidhai Mahonpur amchaini Kambukchora kamio omthai thwi kwlaio. Bo kokborokni bagwi kwbangma samung bwtangbai gwdaljak dal kwbang luku hoda, Luku Hukumuno twiwi naiphiniknani tei kokborokni hamkhwlaini bagwi samung tangthani saktharo. Rwngnogo swrwngwi tongphuruni simino kokrwbai swimungo bo kha warjagwi kokrwbaini hayungo gwdalna chengo.Tripurani nongkhorjak kwbangma koktun bwlai, Magazine ahairogo bini kwbangma swimungrog sapojakha. Swikwrwng Rabindra Kishore Debbarma kokborok bai simi koklopna rwngya wanjwi kokbaibo aswkno kokthai chabwi swithani yak kubuk.
Tabukswk joratwi wansuk kwrwng Rabindra Kishore Debbarma bai kholsabrwi bijap swikha hwnwi chwng kwtal bijaprogo swijak mano. Bini a swijak bijaprogni bisingo nairutukmung bijap kangba tongo. Bini bijaprog kwbangma dalbidal tikhwlainai phasingtwi tikhwlaijakbaikha tei tikhwlaijagwi tongo.
Swinai Rabindra Kishore Debbarma Tripura sorkarni KOKBOROK ADVISOR COMMITTEE -ni bo adong. Abono karwibo bo ADC ni Language Development Committee ni bo adong. Bo kokborok kokno rwgwi kwbangma kokbwkhal swikha tei kokborok kokno rwgwi songsajak kwbangma Seminarrogobo kok sakha tei kokborokni hamkhwlaini lamano phunukna naikha tei naio.
Bini swijak bijaprogni bisingo kwbangmano kokborok luku kokrwbaini bagwi mang samung tangjak. Kok hinkhe Swikwrwng Rabindra Kishore Debbarma kokborok kokrwbaini luku raida, Luku Hukumu abohairogno rwgwi mangno samung tangnani tei khwlainani muchungjagwi bo sak baithang kha riwi phan choyawi samung khwlaio.
Rabindra Kishore Debbarma ni swimung :
* Published books :
1) Hachukni khorang _short stories_ 2002 (first)
2) Kokborok luku kokrwbai__ 2007
3) Kokborok kotal kothoma ___
4) Lam kaham naitugwi _1982
5) Telegu kokthoma bwchap 2014 (17 nos)
6) Hachukni khum – koklop 2008 ( koklop35+koktang 51)
7) Hachukni mwktwi- Short stories 2002 (10 nos)
8) Hachukni twima 2009 (7 folks tales).