Koklop swikwrwng Pancharam Reang bai swijak “Aichukni sari” koklop 2009 bisio”An Anthology of Kokborok poem” bijabo karijakha. Koklopnai koklobo tokla makthamni bisingtwi hoda- dophao hamya,chaya mwnak, somsok nukjakmani kokno khursai swiphunukna naijakha.
Koklopnai o koklopni bisingtwi tokla makthamni kokno khursai phunukna naijakha. O tokla makthamni mung wngkha Gong tokla, Tokla Sikari tei Tokla Raithai. O tokla makthamni bisingtwi hoda-dophao hamya, chaya nukjakmani, hamya, chaya wngmani kokrokno sursai phunukna naijakha. Chwng jotono saimano jesa dopha phano buihaikhe kuchugo kasanani muchungjago. Abohai muchungma jorao hoda-dophani borokrok hamkwraini mungwi bodol swnamlaio tei samung-homung tangwi saka saka phunugwi borokni bwkhano borokni sotonwi tubuo. Phiyaba borokrok borokno puitu khaiui borokni logio rwktharwi imang nukmano mukthang khwlaimano hinwi wansugwi tongphano paithago borokni imang swbaijagwi kochogwi thango . o kokno koklopnaio koklobo khursai phunuknani naijakha.
Thokla gong tokla kochima thakkha
Mode kochikha soito bo kochima Kochik phano jorale tabuk aiyakhu
Koklopno rwgwi naiui saimano Gong tokla wngkha kaisa hamyani marino phunukjago. Tamoni hinamale koklobo nukkha borokrok jephuru borokni sapungni samung homung paiui horni mai chaiui lenglanani bagwi jotono kwchangkhe thuilaiphuru a jorao Gong tokla kochigo. Bini o kochikma jorabai gothogwi kochikya . chwng jotono saimano toklarok aichuk joraose kochigo tei bini kochikma bai luku sichaui baithang sal kahamo samung homung kwchangkhe tangwi twiwi chalaio. Phiya o Gong tokla pungma khwnaui borok swkangnihaikhe phung aikhwna hinwi chongwi muktrwi sichaui naisigwi nailaio. Phiya naisigwi naiui nukha maising horse kolokma tongwi tongkhu. Phiyaba borokrok o gong toklano khao puitu khaiui , hamjagwi , chajagwi sal kaham eba phung wngkhwna hinwi khachongmani tei borokni samung-homung tang manano hinwi wansukmani phiyaba hor mwnak wngjak nukmabai borokni imang, wansukmung, tei gong toklani phaising kha rimani khano kiphilwi naui gong toklano puitu thangliya kha baijago. Tai Gong tokla borokni lenglana jora tei thuna chana kwchang jorano naisigwi manya wngjagwi borokni tongkwchang-chakwchang jorano swbaio.
Koklopno naiui taibo saimankha borokrok Gong toklano puitu baijakmani ulo borokrok swkangni haikheno langmao tangwi twiwi chalaijakha kwchang kwchangkhe imangno khao chobwi. Amohaikhe kwchang kwchangkhe tangwi twiwi chalaimano nugwi haino taisa Tokla Sikari kokchik rio. Chwng jotono saimano tokla sikari mungwi romwi mano chalak, buini khano swlakna kwrwng, buino bandena kwrwng . phiyaba borokrok imang nugwi tonglaima jorao tokla sikari hor kuthuk jorao kochik rikha. Phiyaba swkangni swlai tabukni kisa khorang kotorkhe kochikma khwnao , o kochikma juda nugwi borok wansugo tabukle phung aikhwna hinwi tei borokni salo, imang nukmarok mukthang , supungwi riwano haikhe ma tongjagwi muktrwi sichaui bachalaio . Phiyaba sichaui naiui naimale hainohai horse tongwi tongkhu, mwnak, somsok, kubuljak. Borokrok imang nugwi tongmani tabukle borokni tangjakya bara samung-homung tangwi manano hinwi tonglaimani swkang tokla hainohai o tokla sikari bo borokni bwkhano thwngo tei swbaio. Aboni bagwino borokrok o maknwi tokla tatal, chalak, buini bwkhano swbai hinwi puitu thangliya tei tokl Raithaino kok kwcharo o tokla aichugo kochikdi aichugo kochik manyakhe ta kochikdi swkangni haikhe kochikhe nwngbo borokhaikhe nwngbo kaham ta wngthung buini yago kwlaiwi mathwithung.
O tokla aichugo kochijadi
Haiyakhe nwngbo kaham ta wngthung Buini haikhe kaham ta thwithung
O kokno saimano borokrok saimankha hor diphor kisalaidrobo tokla kochikmani jora. Borok muktraini sichayasini tokla Raithaino kok kwcharo nwng tomung phung aiwi kochik manyakhe ta kochikdi haikhe nwngbo kaham thwiglak. Koklopnai abono sananaio hoda-dophani sinai nuknairok, mokol pasajakrok borokni manthai-sokthaino supungwi manyakhe eba borokrokno logi riui manyakhe borokni muktraino ta swbaidi hinkhe norokbo kaham thwiglak borok haikhe langmao jwngjal kwlaiui ma tongnai. Swkang swkang borokni bwkhao imang phunugwi tei swlagwi tei borokni khano bandeui kwcharo norok yakarwi thanglaio. Chini bagwi samung sokriui tangwi manyakhe chini bwkhano ta swlakdi. Tabukni jorano naikhe nugwi mano tabukni sinai nuknairok borokni baithangni kahamni bagwi simi wansugwi kaham nailaio tei buini bagwikhe eba siya, nukyarokni bagwikhe kaham wansukya. Koklopnai o kokno sana naijago.
Paithago koklopnai o kokno sana naijakha tabukni horok dophani langmao wngwi tongmani jorani kokno. Kwbangma chini borok dophani sijak nukjakrok sakni hamkwrai bagwi simi saktharo tei tongkosong tongnai borokrok bwswk langmao jwngjal tei kostokhe tongwi tonglaija abono borok cherwi nainani thangya . sinai nuknairok abohaikhe tongkhe bini bosongni siya, nukya tongkosong tongwi tongnai lukurok mwnakni kogwi pohor phaiui manya. Haini bagwi sak saichungni kahamni
bagwi wansukmano yakarwi hoda-dophani joto lukurokni hamkwraini lama wansugwi samung – homung thansakhe tanglainani kokno koklopni bisingtwi kwcharo.