Kokborok kokrwbai swikwrwng Dr, Bijoy Debbarma bai swijak “Longtraini Ekolobya” koklop ingraji 1997 bisio swiui karijakha. Laibuma rwgwi naikhe saimano Hayungo longtrai hachuk mungwi kaisa hachuk tongo. o hachugo tongnai lukurok jotono siya nukya, mwnago kwlwi tonglaio. O mwnago kwlwgwi tongnai hachuknino khoroksa cheraini mung wngkha Ekolobya. Bo wngkha hukbar khwlai chanai tongkosong nukhungni khoroksa cherai. Bini langmani jwngjalni kothomano twiwino koklop wajago.
Koklopnai “Longtraini Ekolobya” koklopni bisingtwi abono sana naijakha kaisa bosong, kaisa hao tongwi tongphano kwrwi-gwrwng eba bosong kotor-chikon hinwi tolao swklwgwi tongnijakmani kokno khursai phunukna naijakha. Kokno tongo borok wngwi hayungo achai phaikhe tamo gwnang tei tamo kwrwi jotoni langmao kaisa imang nukma tei muchungma tongo. phiyaba jotono o muchungma eba imango sogwi eba mwkthang khwlai manya. Tai baksa muchungma tei imangno mwkthang khwlaina bagwi sak tharwi swkango yapri sethani gwnang eba dophani kuchugo tongnai borokbai kebengjago, musupjago. Bo jeswk phano arini bisintwi eba kosong lamatwi baithangni muchungmano supungna khwlai phano hodani bisingo kuchugo tongnairok kebengwi tolaono swklwgwi tonina chaitokmani kokno koklopni bisingtwi sana naijakha.
Arjun nono wngna riglak chethuwang phang Nwng nanghorkhe nokha
Kongwi thangano arjunni khorok………………. Nwngbai baksa batai laithani
Durjudan, Judisthir pohlaio kena Nono phaikropna bagwi chaklaio duk,
Koklopno naiui saimano koklobo Ekolobya mungwi longtrai hachuk tongnai hukbar khwlai chanai nukhungni khoroksa sikla cherai tongo. Bo hachugo tongnai borok phano bini khao badukhung swrwngnani wansukma tei imang nukma tongo. bini o muchungmano supungna bagwi bo jesaphano khwlainani eba rinani bagwi tiyar. Phiyaba Arjunsonghai borok kotor eba bosong kotor kuchugo tongnai tolao tongnai Ekolobya badukhung swrwngwi kuchungo kasathani kebengwi kasuo. Tamoni hinmale Ekolobya Dukhung swrwngwi kuchuk , kwplai wngwi bachakhe Arjunsonghai bosong kotor borok lachimung tei khorok kongwi bini tolao ma tongjakna kirijago, aboni bagwino bono kebengwi musup tongo. haiphano Ekolobya kwrwi nukhungni tei tolao tongnai bosongni cherai hinphano bini bwkhao sakni kahamni , kamini kahamni , maa-phani kahamni bagwi mung kuchugo tisane muchungjagwi sak baithang saichung saichung badukhung swrwngo. Tamoni hinmale salsaya salsa muchungma mwkthang wngnai hinwi.
Taibo nugo Arjunsonghai bosong kotorni phaisingo eba ukologo hinkhe gila drunocharya tei sal-tal bebakno borokni nokhlao pohor sahorwi kwrwngwi tongo . tamoni hinmale borok wngkha rang puisa gwnang tei bosong kotor buino buino chariui khanriui tongthokkhe tonimano . haiphano ekolobya bini muchungmano khwlaino tongo bathak karwi . bini o choitokma, kuchugo kasai kami tei bosongni mungno kwchwng khwlaina thangthani bono Arjunsong kebengwi dalbidal kokchaplaiui khwi eba duk akorok chaklaio.
Ekolobya tani muchunglang kasana Longtrai buchuk ……………………..
……………………………………………………… Arjun, Durjudon tei drunocharyasong
Tongo muruklai
Nwng sogoiphuru longtraini buchuk Rasowi tilangnani nini yasima bura,
Koklopno naiui naikhe sathai kwlaio Borok wngwi achaikhe jotono baksa eba soman manthai sukthai tongo. tamo gwnang-kwrwi jotono baksa manthai -sokthai eba khwlaithai tongo. Ekolobya khoroksa hachukni cherai wngwi bobo buihaikhe badukhung swrwngwi kolok, kotor tei kuchuk wngwi kami amchaini, bosongni mungno pirna wansugo. Haini bagwi bo arjunsong bai thansakhe ma swrwngya phano sago kwrwng wngna muchungma bagwi saichungno swrwngo. Bini abohai swrwngthani Arjunsongni mokolo tei khao pherang kokjakmaswk wngjagwi ekolobyano kasonani bagwi dalbidal lama rutuklaio. Koklobo taibo nukha Ojila wasongo awang guriyani chuwak khatijak hima bisngtwi saimano chuwak wngkha kaisa phekjaknai manwi. O manwino romkha hinkhe je imang tongmarokno bebakno swlaijagwi thangnai. Tamoni hinkhe abo kaisa chaya manwi. Taise arjunsong bumul swlaina kwrwng, borokni rang ri-chum kaham kaham tongo . borokni jesa thaio tei khotolo phano yak kwrwngjak mamangse . lama hindi, traffic point hindi, nok kotor -nok chikon hindi jotono thaiono borokni yak kwrwngjak. Haiphano ekolobya bo bini budukhung srwwngna muchungmano yakarya kha thwiyaui khano kwrak tei kaham wansugwi swrwngwi tongo Arjunsong haikhe kuchuk, kotor tei mung kuchuk wngnani bagwi. Phiyaba Arjunsonghai bosong kuchukni borokrok Ekolobyano badukhung swrwngwi borokni swlaibo kwrwng wngjakna kiriui ekolobyano bosong chikon , hachukni siya nukya cherai nugwi bono kasona bagwi eba phaikropna bagwi kena nanglaio . Aboni bagwino Arjun, durjudon tei drunocharyasong murwklai tonglaio ekolobyano bini yasima bura rasowi tilangnani. Tamoni hinkhe ekolobyani yasima bura rasiwi rikhe ekolobya tai badukhung swrwngwi borokni swlai kuchugo kasai manya chongwino dalbidalmani ulo yasima bura rasowi nanani chonglaima nugo.
Paithago koklopnai bini “longtraini ekolobya” koklopni bisingtwi hao eba hoda dophani bisingo kwrwi nukhungni eba hachukni cherairok bo gwrwngrokhaikhe elemgwnang wngwi kamini , hachukni tei sakni mungno kuchugo tisanani muchungo. Phiyaba borok o muchungmano supungna eba mwkthang khwlaina thangkhe gwrwng eba kuchugo tongnai bosongni borokrok bai satok-pitok khwlai kasowi narwkjagwi muchungmano supungwi manya wngmani kokno sajakha.