Swikwrwng Atul Debbarmabai swijak”Toksa Tiyari” kothoma bwsa 2004 bisio”Toksa Tiyari” bijabo karijakha.
“Toksa Tiyari” kothoma bwsano cherwi naikhe nugo kothomao”Budhrai”mungwi khoroksa tonggwrwng tongo. Budhrai wngkha khoroksa buma kwrwi bwsa. Tamoni hinmale buma budhrai bisidok umor phuruno thwi kubawi o maisingno yakarwi thangkha. Buma thwimani yagulo Budhraini langma mwnakhai wngwi phaikha, phiyaba bo sakno kebel wansukya.Botoijwk bini abohai langmano nugwi bwkhao soiwi manjakliya wngwi bini nogo tongthai rikha tei bono bini okni bwsani thaio toniwi lekha-pora khwlai kolok, kotor khwlai tisakha. Budhraibo buihai cheraiya khasinai borok tei jorabai baksa sakno yapri senani kwrwng. Budhrai saimano bahaikhe langmano chwngsasa khainai, tamoni hinmale cheraini simi bumani maya manliya tei bupha tongphano kwrwibai baksa. Aboni bagwi bo bini botoijwk tei botoinose buma buphahaikhe wansugo. Abohai tongmungni bisingtwi tini kolok, kotor wngwi bachakha.
Kothomao teibo nugwi mankha Budhrai swrwngmani logi logi je mansak samung-homung khwlaio tei seleryawi phung aisiri-siri bachai harung(kheto) alh bayu tei jora wngkhe rwngnogo thango. Abohaikhe tongte tongte kolok, kotor wngwi rwngrem kaichio swrwngwi tongphuruno KBT hinwi phwrwngnani sebok mankha. Kokborok teachers manwi bo bini langmano teibo kuchugo tisanani tei kokbiti kaham pirnani sepmankha. Abohaikheno nok-nukhung khai bwsa khoroknwini bupha wngkha. Budhrani bihikni mung wngkha Tokhiti. Tokhiti bo buihai bwrwiya jemansak nok-nukhungni samung-homung khwlaio tei bwsa-bwsai bebakno jaijaikhe naikolwi tongo.Abohai bihik manwi Budhraini langma teibo chwngsakha. Budhrai KBT sebok khaiphano haino jorano mangwna rohorya jemansak jorabai baksa gothorwi muikwthwng-thaikwthwng, pukhirio ah rio tei nok kitingwi khumbari khaio tei nok kupulwng malmata akorok phalwi kaichisa jaga paikha tei bwsa takhuknwinobo agulini umakanta rwngnogo poriwi tongmani mangpili kothomao nukjago.
Kothomao budhrai buma kwrwi bwsatwtwi phan obo bini langmano kolok, kotor khwlai bachamani nukjago.Budhrai tabuk rang puisa tei Chanani-nwngnani biyal kwrwi haikheno tini I twisaskolok kamio puila tin nok halaplkha bo. Salsa biswamoni bini kheto Budhraino phalo, bini o kheto paimano twiwi Budhraini langmao kebengmung wngwi bachakha. Kothomao Robiya mungwi khoroksa borok tongo. Bo Budhraino bini kheto ganao eba ario kheto paio hinwi kokbango. Phiyaba budhrai kwtwi kwchangbai bono sao, phiyaba bo bujina naiya teise khorang kotorkhe joliwi kutugo.Abohaikheno borok khoroknwini bisingo kokbanglaimani nukjago yagulo Robiya,Budhraino domki riwi kwlango. hatibarsani ulo horkuthuk jorao Robiya ugroponthi rohorkha. O ugroponthini bodolo Robiyani bwsala kusu subenbo tongo. Haikhe hor kuthuk jora phaiwi Budhraino rang saichi(10,000) sanphaio. Phiyaba Budhrai riwi wngmabai kokbanglaiwi Budhraino silaibai kogwi buthar kwlango. Bini nukhung chwngsasakhe tongwi tongmano mokolbai naiwi manya wngwi tini haikhe nok-nukhung tei bihik-bwsabai hakchal khwlaikha. Abohaikheno tini chwngsasa nukhung tei hayungno karwi ma thangkha. Obohai chini dophao kwbangma borok tongo kwrwi twtwibai ajiwi kisasa nukhung chwngsasa wngkhe bono bahaikhe tolo swkwlwkgwi mano abose naichomo.