Kothomayungni berem bakmungo kothomayungo swijakmani, chapjakmani,goron rwgwi juda judakhe bakjakmani rokno khamao swijakha-
- Romantic Novel
Kwchar jorao Europe Hakuarkuk-o koklop tei kokbomo kaisa bwkha khakchangmung swimung swina chengjago abono hino Romance. Aboni ulo baithango kwrak-halok, hamjakmung ruthani ‘Romance’-no thepagwi tongo.
- Autobiographical Novel
Swinai bini laithangjak jorani wngthangjak kokrokno eba bini sakbaithang wngwi thangjak kokno muituni phanbai swimungo swio. Swinai bini elemno phwnagwi kothomayung swijago. Swinaini Lachimung, Kirimung, je rokno swinai huinani naio phiya porinairokni thaniabo khwlaisakheno romjagwi paio.
- Regional Novel
Amchaini Tongmung-Chamung twiwi swijakma kothomayungno hinjago Regional Novel. Obotwi kothomayungo kubuljak tongo Amchaini Tongthar, Hapar, Lukurokni Tongmung-Chamung, koklam, Nobar-Twibar, Hodani Raida, Khajamung-Khakamung, Kok samani gwrwng bebakno tongkosong kubuni amchairognibai pherlaio. Abotwi khakjak thaino chongwi swijakma kothomayungrok kwbangmao tongo.
- Historical Novel
Laibumani mungsaswk muito khwlaijaknai wngmarokno rwgwi aphuruni Tongmung-Chamungno kosolkhe swijak kothomayungno Historical Novel.
- Poetic/Lyrical Novel
Koklop kothomayungbai gwdalwi thangkhe kwtal mari manjujago. Abotwi dalni kothomayungno Poetic Novel hinjago.
- Gothic Novel
Saktwima karnatwi kothomayung eba kirimagwnag kothomayung. Bisi 1800 century-ni paithak tei 1900 century-ni puilao Europe kuar Ha-kotoro obotwi dalni kothomayung swimungrok nukjago.
- Picarasque Novel
Sikok, mamgkhok, sekpronai eba Dakait rokno twiwi swijak kothomayung. Obotwi dalni kothomayung Kokborogo kwrwi haiphano kokborok luku kokrwbaini kereng kothoma rogo nukjago. A kereng kothomarok wngkha Raidaphang, Bamrai Sikok akorok.
- Phychological Novel
Obotwi dalni kothomayungni kokbubak gwrwng phunukmung eba gwrwng cherwi naimungno kotor khwlaiwi phunukjago. Kothpmayung swinaini samung wngkha bwkhani tongmung eba bwkha bubotwi wngwi tongkha bono chongmung tei abotwi khapangni jora Borkni gwrwngno phunukmung.
- Political Novel
Je kothomayungo Rajniti-ni wansukmung kahamkhe sapuljak eba kothomayungni bubago Rajniti tongo bono no Rajnitini kothomaug hinjago. Rajnitini hupremungbai luku langmani khorang je kothomayungo swrai swraikhe phunukjago bono no Ranitini kothomayung hino.
- Social Novel
Je kothomayungo Hodani, Hani, Nukhungni, Tongtharni kokrok kubuljak tongo bono Social Novel eba Hoda Kothomayung hinjago. Obotwi kothomayungrok kwbangmano tongo.
- Sciencetific Novel
Scientific novel wngkha soisima rwgwi swijakma kothomayung. Abotwi dalni kothomayungo thinangni bagwi wansukjak eba baithangni chongmatwi kothoma swijago.
- Epic Novel
Kothomayung swinai jephuru Hayung tei langmani bechebo swrai swrai wansukmung kuthuk wansugwi nukmunh mungsaswkno khatujngwi Ha, Jora tei manwirokni ario tongwi langmani umorni kok kubuino phunugo, aphuruno obotwi dalni kothomayung achaio.
- Dramatic Novel
Dramatic novel wngkha mungsaswk kothomano twiwi thungnuk swijakmani. Abotwi kothomayungo Borokni gwrwngno yaphango siniwi maya. Kothomayungni paithago se borokrogni tongmung-chamung tei borokni samungni bisingtwise romwi nana nango.
- Anti Novel
Kothomayungni gwrwng cherwi naima kwrwi, kothoma kokbothoma kwrwi, Plot kwrwi, kothomayungni gwrwng kwrwi abotwi kothomayungno hino Anti Novel.