Kothomayung wngkha tabukni jora kwtalni phan gwnang lama. Oro swinaini baithangni langmao nukmung, swimung tei kha nangmungrok khoroksaswkni langmano rwgwi kokthai chabwi rujakhe abono kothomayung hinjago. Bisi chichukurani jorao kokbom kokrwbaini swimungo dalsa wngwi nukjakmani ulono kothomayung achaio tei achaimani bisirani bisingono Hayungo jaikhe yarwng surna chengo. Sana thangkhe langmabai gwdalwi tongo. Soi soi kothomayung tamono hin abono swraisakhe sanani belaino kuthuk. Haiphano kothomani bising kothomabwsa tei kothomayungni gwrwng kisa juda. Sana thangkhe langmabai gwdalwi tongo kothomayung. Langmani nukmungrokno rigwi phunukmano kothomayung swinaini samung. Aborokni bisingo tongo- Plot (Wngmung), Character (Tongwrwng), Dialogue (Koklam), Setting and Milieu, Symbolism (Mari), Style (Tongdal). Kothoma thaisa kothomayung wngthani tongna nangmani gwrwngrokno khamamo sukrubwi swi phunukjakha-
- Plot (Wngmung)
Kothomayungni jotonisai naijaknai naimung wngkha bini kothoma. Juda juda wngmungni kokthum, wngmung tei tongwrwngno sapolwi a kothoma jai jaikhe nukjakhe abono hino Plot (wngmung).
- Character (Thwngwrwng)
Je Borokno twiwi kothoma wajago bono eba borokno a kothomani tongwrwng eba Character. Linguistics-ni kogo Character wngkha- “An extended verbal representation of a human being, the inner self that determines through speech, and behaviour”. Tongwrwngo Borokni phatarni tongmung-chamung simi hinjakya bini bisingni wansukma, koklam, tongmung-chamung akorokni bisingtwi aborokno sinijago.
- Dialogue
Kothomayungo koklamni khuksa aswk bangthayaphano abono jaikhe phwnangmani bisingtwi kothoma tei tongwrwng pirmano sinithani belaikhe chubao. Tongwrwngo kha nangmung tei kok salaimungno rwgwino porinairokni khano ninangrio tei khatungrio. Koklamni bisingtwi kothomayungo tongnai Borokrokni gwrwngrok kahamkhe sinijago.
- Setting and Milieu
Kaisa thungnuk eba kothomani haino kaisa kothomayungnibo wngmungrok tongo. Wngmungrok tongmanio aro tongwrwngrok tonganw tei aboni bagwi chongjak thai kwrwngsaswk nanganw. Chongjak jora kaisaswgo thai kwrwngsaswkni tongmung-chamungno rwgwino kothomayung achaiwi phaio. Kothomayung swinai a thaio baithang chongmatwi thai tei jora saiwi nao.
- Symbolism
Koklop, Thungnuk tei Kothomarokni haino kothomayungobo marirokno swimungni samungo phunangjago. Sanani thangkhe mari wngkha mungsakswk rikjak mari oboni kokmang gwnang. Jorao lukurokni bagwi sinijak mari ‘Public Symbol’ eba jorao khoroksa Borokni bagwi simi ‘Private Symbol’ samungo thepajago.
- Style (Tongdal)
Latin kok ‘Stilus’ kokni simi ‘Style’ kokthai achaio. ‘Stilus’ kokthaini kokmang wngkha ‘writing instrument’ (swijaknai manwi) tei ‘Style’ kokthaini kokmang wngkha kokthaino sajogwi kokbwtang swnanwi bebak narrativeno swnamo.