Kokborok kokrwbai swikwrwng Dr, Nilmani Debbarmabai swijak “Jonoshika choba tai Kokborok kokrwbai” kokbwkhal 2016 bisio “Suri” bijabo karijakha. Swinai o bwkhalni bisingtwi 1945 bisio tiprasa kami amchaio rwngnok chenglaimani tei motha khalaiwi dophani hamkwraini samung- homung tangjakmani kokno khursai swijakha.
“Jonoshika Choba tai Kokborok kokrwbai” kokbwkhalno rwgwi naiui nugwimano 1945 bisini 27th December salmario chini tiprasarokni mokol pasanani chengjakkha. O mokol pasanani lama wngkha kami amchaio rwngnok phiyoknani. Chwng jotono saimano rwngnok phiyokhe chwng siya phano rwng swrwngwi sinai, nuknai, saimanai tei mokol pasao. Aboni swkango saisai bisi romwi chini songduk lukurok rwngnok kwrwini bagwi siya, nukya ,mokol pasaya huk-haba khwlai chalaijao. Tai manthai sokthai mana tongmarok bo manya seplejagwi tongjago. Borok swrwngnani muchungjak phano swrwngnani sep kwrwini bagwi khao kha khamwi ma tongo. Phiyaba 1945 bisio Jonoshika mungwi kaisa motha khajakmabai chini langmao pohor pirjakha. O mothani naharmung wngkha chini borokrok swrwngmung kwrwini bagwi siya, nukya, mokol pasaya, wngwi tongmarokno rwng swrwngriui sichamungni lamao tubunani tai kami kamirogo rwngnok phiyogwi chukya nukhungni cherai khonairokno phwrwngwi elemgwnang khwlai tisanani . o jonoshika choba chini songduk dophani bagwi kaisa rangchak hinwi mano.
Kokbwkhalno rwgwi naikhe nugwimano 1945 bisio “jonoshika motha’ songchajakha. O mothani achukphang wngkha Sudhanwa Debbarma tai bono karwi Aghur, Nilmani, Hemanta, Dasarath akosong Durga Chowdhury kamini Hemantani nokholao pandani koklam salaikha. Tai borokni koklam wngkha chini kami amchaio rwngnok phiyoknani tai chini cherairokno phwrwngwi mokol pasarinani. Aboni bagwi borok taibo kok chaplaikha kami amchaio rwngnok phiyoknani swkang kami kami thangwi kamini lukurokno puila o kok sanani tai ulo borokno rwngnok tangnani kok kwcharnani. Tai rwngnok tangnani bagwi bolongni wa, buphang tanwi tangnani kokno bo kamini lukurokno saka,haikheno kami kami rwngnok tangjakkha tai kamini cherai-khonai jotono rwng swrwngnani lama nukkha. O jonoshika adongni wansukmung tei naharmung songduk lukurokni kaisa lam kaham tei athukiri phwna ngkha. Borokni o saktharwi samung tangma dophao pohor rikha.
Chwng naio I hano swnamnani Chwng naio I hano chaloknani Wanjwi thuruksa joto bigwrabai
Thansa wngwi tongnani
O kokbwkhalno rwgwi naikhe saimano o mothano kitingwi a jorao koklop, kothoma, kokrwbai bwlairok, koktungrok swikarijakha. Aboni bising kaisa wngkha” kwtal kothoma” kokrwbai bwlai jonoshikani bahai tei phan manwi komthing karijago. Aboni ulo mothani adongsong juda juda wngwi thangkha , baksa thwngrwngo gwdalkha tei baksa kuchuk berem porinani thangkha haikheno twrwk twrwk motha baikha. Haiphano tabuk phano lukurokni khao songduk dophani bisingo jonoshikani kok bwkhao swrapjak. Songduk bosongrok tai pogwi manya umor tongsakno muitu khaijaknai. Borokni o wansukmung tei samung buthaino manwi yachagwi yagulo tai juda juda motho songchalaijakha. Tai Kokborok kok , kokrwbai tei lukubosong mokol pasai bwskango yapri selaikha.
Paithago o kokno sathai kwlaio Jonoshika motha songduk dophani athukiri hinwi mano. Borokni mothani samung bwtangni bisingtwino kami mwlwkrogo saisai bisi romwi rwngnok kwrwi swrwngwi manya siya nukya wngwi mwnak kwlwgwi tongmani phiya o motha khaui o mothani adongni wansukmung kaham wansukmabai kami kami rwgwi rwngnok phiyokjakha tai songduk bosongni lukurok rwng swrwngwi kolok, kotor tei kuchuk kanani lama saimankha. Aboni bagwi o jonoshika motha songduk lukurokni khao muitu khwlaijagwi umor kusung kusung tongnai.