Kokrwbaini dale dal bedekni bisingo kothomayungbo deksa tongo. Kokrwbaini kwbangma swimungni bisingo koklopyungni ulo kothomayungno kotorkhai swijakthani achukthai mano. Kothomayung swimungni bisingtwi kokrwbai teibo kwtal jorao hapnani eba sinijaknani lama mano. Kothomayung kotorkhai swijakmani bagwi oro kokni gwrwng tei dophani tongmung-chamung, hukumu-mukumuno phunuksugwi mano. Kokrwbaio kothomayung Chichar ra (18th century) bisi England hao puila swina chengjago. Engraji kokrwbaio Daniel Defoeni yaktwi kothomayung charisugui swijakmani chengo. Aboni ulo Chi Chuku ra (19th Century) bisi Bengali kokrwbaio kothomayung swina chengjago. Bengali kokrwbaio Bankim Chandra Chattupadhayni yaktwi kothomayung chasugwi swijakmani nugu. Kubuini kokrwbaihai kokborok kokrwbaiobo Nwichi ra (20th Century)bisi swikwrwng Sudhanwa Debbarmani yaktwi kothomayung swina chengjagu. A jorani simi lama manwi tabuk kokborokbai kothomayung swinai bangrwrwgwi tongo.
Kokborokbai kothomayung swinai tei borogni swimungno tabukswk jora naitugui manmano khamao swiwi phunukjakha.
Sudhanwa Debbarma
Chethuwang- 1954-56 bisi(Kwtal kothoma kokrwbai bwlai)
Hachwk Khurio- 1987 bisi
Shyamlal Debbarma
Khong-1996 bisi
Tongthai Naitugwi- 2007 bisi
Nanda Kumar Debbarma
Rung- 2001 bisi
Bubagwrasa- 2018 bisio
Sunil Debbarma
Langmani Rukungo- 2003 bisi
Sefali Debbarma
Lokhopoti- 2010 bisi
Khorang Bukcha Khalwng- 2015 bisi
Atul Debbarma
1980- 2006bisi
BiswaKumar Debbarma
Ostinogo- 2000 bisi
Kunjan Bihari Debbarma
Mwnakni Pohor- 2002 bisi
Bijoy Debarma
Dolai Twima Naro-2008 bisi
Chandramani Debbarma
Sokorom- 2020 bisi
Kokborok kokrwbaio 1954 bisini simi chengwi 2020 bisi jorano rwgwi kothomayung swijakmani.
By Bikash Debbarma